Leingi er tað, ið væl skal verða! Loksins handaðu vit stuðulin frá Atlantic Airways Tórshavn Marathon 2023. Umboð frá Alzheimersfelagnum, Heilafelagnum og Parkinsonfelagnum møttust við okkum í Bragdahúsinum.
Øll, sum meldaðu til at renna ella ganga, kundu stuðla við einari peningaupphædd, og frá tilmeldingargjaldinum til gongu-hálvmarathon, fóru 100 kr beinleiðis til feløgini.
Tá eitt so stórt tiltak, sum Atlantic Airways Tórshavn Marathon skal haldast, krevur tað nógv av okkum í Bragdinum. Millum annað skulu vit brúka um 100 vaktarfólk. Og tá er samstarvið við Alzheimersfelagið, Heilafelagið og Parkinsonfelagið eitt sera gott íkast, tí tey kunnu hjálpa okkum við tí arbeiðnum. Tað eru vit sera takksom fyri.
Løtan í Bragdahúsinum var hugnalig, og vit fingu góð hugskot at gera okkara tiltak enn betri.
Takk fyri í dag og vit gleða okkum til framhaldandi samstarv í 2024.