Jan Eysturtún Niclasen er ein av teimum nýggjaru vaksnu limunum í Bragdinum. Hann er nógv úti í verðini, er skipari og siglir við Mærsk, men tá hann er heima, rennir hann við Bragdinum. Serliga sunnumorgnar. Jan spældi nógv hondbólt, men gavst og fór so at renna nøkur ár seinni. Og tað sær út til at tað var tað rætta.
Í morgun kom hann ringlandi við fleiri heiðursmerkjum og orsøkin var, at hann sum tann fyrsti, og einasti føroyingur, hevur runnið øll fimm hálvu marathon, sum eru í seriuni “Superhalf”. Einasti, tí nú er kappingin broytt til at rennast skulu 6 hálv marathon og tey skulu rennast innan fyri 60 mánaðar. Tá Jan byrjaði ferðina, var kravið, at renna fimm.
Tað er ikki so lætt at leggja til rættis hjá einum, sum er so sjáldan á landjørðini, men hann hevur so gjøgnumført tey í Keypmannahavn, Lissabon, Prag, Valencia og í Cardiff. Og tað var í Cardiff at hann fekk flotta heiðursmerki fyri avrikið.
Hjartalig til lukku við avrikinum Jan!