Alt spældi væl av, tá vit skrivaðu søgu leygarmorgunin 30.september kl. 9. Tá var fyrsta ultrarenningin, Havnardalur Backyard Ultra 2023. Luttøkutalið var sett til 40 og nakrar dagar undan kappingini var fullteknað. Okkurt forfall var á degnum, og tí kundi onkur, sum brellaðist eftir at royna hesa renningina, sleppa við. Royndir og óroyndir rennarir vóru á listanum og felags fyri meginpartin var, at tey ikki høvdu luttikið í ultrakappingum áður.
Hugskotið eigur Hallur Holm, sum sjálvur hevur luttikið í fleiri backyard kappingum seinastu árini. Hann er tann føroyingurin, sum hevur runnið longst, heilar 248 km og eigur sostatt føroyska metið.
Havnardalur var vælegnaður til kappingina. Karmarnir vóru góðir, ti høllin hjá Ríðingarfelagnum varð brúkt og har kundu luttakararnir finna sær sítt pláss til hvíld í pausunum og eta og drekka. Har var væl vartað upp við køkum og kaffi, grýturætti, bollum og suppu og øðrum góðum, so eingin nýttist at renna hungurstungin. Luttakararnir høvdu eisini okkurt við sjálvi, so borðini vóru full í “gels”, drykkum av ymsum slagi, barrum og bommum.
Backyard-renning er lutfalsliga nýtt kappingarslag, har tað ikki ræður um at renna skjótt, men at halda á og halda út. Setningurin er greiður. Renn 6,7 km innanfyri ein tíma. Brúkar tú 40 minuttir um teinin, kanst tú hvíla í 20 minuttir, og brúkar tú 58 minuttir, er støðgurin 2 minuttir, tí á næsta heila tímanum byrjar næsti 6,7 km. Og soleiðis verður hildið fram, til bert ein rennari er, sum megnar at renna eitt umfar uppá 6,7 km innan fyri ein tíma.
Tað var hent at hava okkurt at liggja ella sita á, so beinini og kroppurin kundi hvíla minuttirnar, tey høvdu, áðrenn næsta umfar byrjaði.
Fleiri luttakarar høvdu hjálparar við, áskoðarar koma at forvitnast og huglagið millum øll var gott, ja heilt serstakt. Veðrið gjørdi eisini sítt til, at alt eydnaðist væl.
Hesa ferð góvust tvey tey seinastu í senn og tí vann eingin. Men – vit halda at øll, sum meldaðu til, eru vinnarar og tí skulu tit øll fáa eina heilsan frá okkum. Hjartaliga til lukku við avrikinum. Fleiri av tykkum eru allarhelst ovfarin av at tit kláraðu at halda út og at tit fluttu tykkara mørk leygardagin.
Einki er at ivast í, at Backyard kappingin er komin fyri at verða og vit eru mong, sum longu gleða okkum til næsta ár.
Stóra tøkk tit sum skipaðu fyri. Hetta var so gott, frá byrjan til enda 🙂
Hátíðarhald verður á torginum í SMS týskvøldið kl. 18.30-19.30 og øll eru vælkomin.