Kvinnur og menn

Bragdið var stovnað av fyrstan tíð 17.oktober 1947. Átta ungir fimleikarir úti í Bø í Tórshavn stovnaðu felagið. Allir vóru føddir frá 1930-1933 og teir vóru: Heri Jensen, Magnus Dam Jacobsen, Simme Jacobsen, Palli Gregoriussen, Marner av Kák, Erling Simonsen (lítli), Hans Jacob Egholm og Egon. Teir høvdu sæð ein film um Jessie Owens, ein lítlan amerikanskan ítróttarmann, sum vann fýra gullheiðursmerki í OL í Berlin í 1936. Filmurin kom til Føroya eftir kríggið og gav unglingunum íblástur at íðka frælsan ítrótt og at stovna felagið. Um sama mundið kom Martin Holm hein til Føroyar. Hann hevði lært til fimleikalærara og helt dreingjunum til. Martin Holm helt, at tað var eitt bragd, at nakrir unglingar høvdu fingið hetta í lag og harav kom navnið Bragdið.

Í gerðabókini hjá Bragdinum frá 1947-1954 stendur hetta, sum tað fyrsta:

Tað var fríggjakvøldið t.17-10-1947 uppi í Fimleikarhøllini. Teir “gomlu” fingu harða ábreiðslu tí teir ikki høvdu so mikið sum eitt pláss harfólk kundu íðka ítrótt. Tí gjørdu vit, Magnus, Hans Jacob, Egon, Heri, Palli, Simme, Lítli og Marni, av at “hetta óskilið” ikki kundi ganga longur og fyrireika nú eitt fríítróttarfelag.

Vit eru nú farnir undir at gera ein ítróttarvøll á trøðni hjá Chr.Jensen og vónandi verður hann “líka góður” sum hann í Gundadali” (Gerðabók 1947)

Tað vóru bara nakrir heilt fáir limir í Bragdinum í byrjanini. Allir dreingir, sum høvdu fylt 14 ár, kundu gerast limir. Í 1951 byrjaðu unglingarnir at byggja eini litil hús við vøllin í Gundadali. Í 1954 datt felagið niðurfyri.

Tann 4.januar 1969 endurstovnaðu ítróttarlærarar Niels Nattestad (Natte) og Hilmar Joensen felagið. Mesta virksemi var tá úti á Frælsinum, men okkurt virksemi var eisini í ítróttarhøllini á Hálsi. Tað er ikki greitt, hvussu leingi felagið var virkið tá, men tað datt so niður fyri aftur.

Í 1986 var felagið so aftur endurstovnað. Hesa ferð vóru tað Niels Jákup Jakobsen, Absalon Hansen og Áki Hansen, sum saman við ÍSF tóku stigið. Tað vóru teir nýggju oyggjaleikirnir, sum tóku seg upp í 1985, sum vaktu áhugan fyri frælsa ítróttinum. Frælsur ítróttur er tað stóra á oyggjaleikunum. Felagið hevur verið støðugt síðani tá

Endamálið hjá felagnum er at íðka frælsan ítrótt. Limatalið er vaksið úr næstan ongum til 390 limir, børn, ung og vaksin. Í 1998 keypti Bragdið ein part av gamla B36 húsinum við niðara vøll í Gundadali. Tórshavnar Kommuna yvirtók hølini í 2020, tí tey skuldu brúka økið til parkeringspláss í samband við útbyggingina av Tórsvølli. Felagshølini eru nú í ítróttarhúsinum við Tórsbreyt . Tó er mesta venjingar virksemi við Tórsbreyt.