Í fagrasta várveðrinum í dag, vann Rógvi Kárason flaggdagsrenningina. Hann rann teinin í 23.02 min. Sigurin var ongantíð í vanda og hann lá á odda allan teinin. 20 sekund seinni kom Oliver Granhøj á mál og so var spenningur um triðja plássi, tí Bogi Hjalt og Torbjørn Hentze settu ein spurt í gongd, tá teir komu úr rundkoyringini og sóu málportalin. Bogi vann spurtin og gjørdist sostatt triði maðurin, sum kom á mál.

Hjá kvinnunum var ein nýggjur flaggdagsvinnari, Lydia í Lambanum úr Roysninum og tað var heldur eingin ivi um sigurin. Tíðin var 30.31. Næsta kvinnan var Hergerð Heldarskarð, Bragdið og triðja kvinnan var eisini úr Roysninum, Hallbjørg Danielsen.

Úrslitini síggjast á leinkinum her: https://my.raceresult.com/284069/results

Nógv børn luttóku aftur í ár og vit høvdu stórar ætlanir um at tíðtakingin skuldu rigga við chippum í startnumrunum, men av onkrari tekniskari orsøk, riggaði skipanin ikki fyrr enn elstu børnini fóru avstað. Tí eru ongar tíðir tøkar til U9 og U11, men røttu vinnararnir fingu heiðursmerkini.

Til heilsurenningina luttóku eisini nógv og tað gleðast vit eisini um. Luttøkugjaldið frá heilsurennararnum fer beinleiðis til Sclerosufelagið, sum vit samstarva við. Tey gera nógv burturúr við telti á Kongabrúnni, har tað ber til at fáa eitt prát, ein drekkamunn og samstundis eisini lata stuðul. Við teirra tiltakið seta tey veruliga lív í økið og tað riggar væl.

Eitt tílíkt tiltak krevur nógv av okkum og tí eru vit sera takksom fyri alla hjálp vit fáa. Gott samstarv við Tórshavnar Kommunu og mynduleikarnar, og hesa ferð við Smyril Line, tá Norrøna kom til kaj mitt í øllum, MBM fyri kakao og Mist til børnini og ikki minst, túsund takk okkara limir, sum altíð er klár at hjálpa. Alt frá at gera tilmeldingina klára fyrst í apríl til í dag kl. 18, tá økið var ruddað og útgerðin var sett aftur í felagshúsið.

Takk tit øll og takk Sclerosufelagið. Eitt er heilt víst – vit eru saman um flaggdagsrenningina aftur í 2025!

Myndir eru á okkara Facebooksíðu og leinki er her: https://www.facebook.com/media/set/?vanity=bragdid&set=a.958037766331067 og her: https://www.facebook.com/media/set/?vanity=bragdid&set=a.958036026331241